Chapter 4

"Bakit kailangan kong sumama?" tanong nito.

"Ayoko ng maraming tanong Irish."

Ipapakilala n'ya ito sa mga empleyado n'ya. At dahil co-owner niya ito kailangan niya na din itong turuan ng pasikot-sikot sa pagpapatakbo ng kompanyang kapwa ipinundar ng kanilang mga magulang. Pareho silang nag iisang anak kaya pareho din silang tagapagmana ng nasabing kompanya.

Tumingala si Irish sa pitong palapag na building, six years old lang s'ya ng huling umapak s'ya rito at halos hindi n'ya na matandaan ang hitsura ng naturang establisiyemento.

"Irish!" napabilis ang paghakbang ng dalaga ng makitang naiinis na naman ang binata.

"Siya si Miss Irish No, anak ng namayapang co-owner ng papa." Ngumiti ang dalaga. Hindi niya magawang ipakilala ito bilang fiancee dahil naiirita s'ya sa kilos-bata nito. 

"Hello po!" kumaway si Irish sa mga empleyadong nakangiti at panay ang bati ng good morning.

Seryosong naglakad si Gab, nakasunod ang dalaga. Umikot ang paningin ni Irish sa paligid ng silid. Nakita niyang maayos ang pagkakalagay ng mga gamit. Maging ang pagkakasalansan ng mga dokumento sa mesa katabi ang computer nito. Maganda ang interior design ng opisina ng magiging asawa, bumagay sa personalidad ng binata. Matatanaw mula sa bintana ang nagtataasang establisiyemento sa hindi kalayuan.

"Ang ganda ng office mo." Puri ni Irish, larawan nang pagkamangha. Tila nagugulat si Gab dahil lumaki naman ito sa marangyang pamumuhay pero tila lagi itong nasusorpresa sa mga nakikita nito.

"Magiging office mo na din."Sagot ni Gab na tumayo at tumanaw sa labas nang bintana.

"Ako?" lumapit ang dalaga sa binata.

"Kailangan mong magtrabaho dito after ng kasal natin."

"Pero hindi ko alam kung paano? Isa akong artist, painter ako." sumimangot ang dalaga, humawak sa braso ng binata.

"G-gab.." May kung anong kumislot sa bahagi ng damdamin ng binata nang maramdaman ang palad nito sa balat n'ya.

"Sa ayaw at sa gusto mo kailangan mong matutunan ang pagpapatakbo ng negosyong iniwan sayo ng Tito Alfred. Kalimutan mo na ang trip mo sa buhay. Kailangan mo akong tulungan sa pagpapatakbo ng garments."

"Trip?" nasaktan siya sa sinabi nito. Mahal n'ya ang pagpipinta. Pangarap niyang makilala sa mundo ng mga artist pero dahil hiniling ng ama na pakasal s'ya kay Gab, kinalimutan niya na ito. 

"Hindi ko alam kung ano ang tawag sa mga gusto mong gawin? Pero bilin 'din ng papa mo na dapat mong matutunan ang pagpapatakbo ng kompanya." kahit papano kasi may alam si Gab sa mga pinagkaabalahan nito habang nag aaral ng Fine Arts sa States. Bukam-bibig ito ng mommy niya at panay ang kwento ng buhay ng dalaga kahit hindi siya interesado. Hilig daw nito ang pagpipinta at may iilan itong ipininta na ginawang koleksiyon ng ina.

"Hindi 'yun trip, passion ko 'yun."

"Okey passion na kung passion. Pero kailangan mong sumunod or else...mawawalan ka ng shares." 

"Gagawin mo 'yun?" Bagamat alam niyang nasa kondisyon 'yun ng ama.

"Tuluyang malilipat sa'kin ang lahat ng sayo kapag hindi ka natutong magpahalaga sa pinaghirapan ni Tito. Nakasaad 'yun sa testamento." Napahalukipkip ang dalaga at umupo sa sofa. Matatanggap niya itong mapangasawa pero hindi ang pagpapatakbo ng kompanya dahil wala siyang hilig sa negosyo.

"Ayusin mo 'yang mukha mo maya-maya ng konti papasok si Alma at ayokong magmukhang kindergarten student na nagtatantrums ang mapapangasawa ko sa paningin ng sekretarya ko."

"Alright." Narinig niyang sagot ng dalaga 

Naiiling na nag umpisa nang magbasa ng documents ang binata.

"Hindi ba ako pwedeng lumabas man lang?"

"Hindi pwede, baka magkalat ka pa."

"Gab." Bata pa din talaga ang tingin nito sa kaniya. Ganitong-ganito siya kung tratuhin ni Gab noong six years old pa lang s'ya. 

"Sumabay ka sa akin mamaya. Buksan mo na lang 'yang tv, manood ka para hindi ka mainip." 

Mahihinang katok ang gumambala sa katahimikan ng silid na 'yun kasunod ang pagbukas ng pinto. Iniluwa nito ang matangkad at morenang babae. Ngumiti ito kay Irish na tila nahihiya.

"Irish, secretary ko. Alma siya ang mapapangasawa ko at boss mo na din."Pagpapakilala ni Gab.

"Hi po!" Kimi itong ngumiti.

"Hello!" Ganting bati ni Irish. Parang gusto n'ya itong kaibiganin agad. Ang gaan ng loob n'ya sa sekretarya ni Gab. Sa tingin ni Irish matanda lang ito sa kan'ya ng ilang taon. Tumingin s'ya kay Gab, nakita n'yang gusto s'yang pandilatan nito. Monster talaga, aniya sa isip ng dalaga. Nakikinita n'ya ang kulay itim na bilog na tila ring ng basketball sa gawing uluhan nito. 

Nahalata ni Irish ang tila pagkailang ng sekretarya. Sino ba naman ang hindi mai-intimidate kapag ganito ang boss mo? Sa kabila ng kagwapuhan laging nakakunot ang noo at palaging seryoso. Na-curious tuloy s'ya kung masasaya din ba ang mga empleyado ng isang Gabriel Villaflor? Marahil hindi, bulong ng kabilang bahagi ng utak n'ya.

"May kailangan po kayo Sir?"

"Pakisabi kay Mang Janno pakibilhan ng food si Irish. Anong gusto mo?" kay Irish ito nakatingin. Napangiti ang dalaga. Mabait naman pala! 

"Fast food sana, ahm jollibee please chickenjoy 'yung bucket ha." Masigla n'yang sagot.

"Sige po, Ma'am Irish." mabilis na itong lumabas ng silid.

"Para kang bata, pwede bang magmukha ka namang pormal sa harap ng empleyado ko!"

"Eh, sa ganito ako eh." inirapan ni Irish ang binata na lalong ikinainis  nito.

"Pwes baguhin mo! Nakakahiya! Para kang ewan!" Asik nito.

"Nakakainis talaga!" sa isip ni Irish. Napaka-diktador at bossy. Nawalan na siya ng ganang manood kaya pinatay n'ya na lang ang telebisyon at naglaro ng games sa cellphone. Bumalik lang ang sigla n'ya ng makita ang dalang pagkain ng sekretarya nito. Niyaya niya itong sabayan s'ya pero tumanggi ito, sa pantry daw ito kakain kasabay ng iba pang empleyado.

"Pati ba sa pagkain para kang bata?"Napahinto sa pagnguya ang dalaga. Lumapit si Gab kay Irish at kumuha ng tissue, pinunasan ang ketchup sa gilid ng bibig nito.

"Thank you!" Ang tamis ng ngiti ni Irish. Hindi naman pala likas na masama ang ugali. Bulong ng isip ni Irish.

Natigilan si Gab at ikinunot ang noo.

"Nakakahiya sa mga empleyado na makitang dugyot ang mapapangasawa ko!" Asik nito at bumalik na sa swivel chair.

Ngumuso si Irish. "Gwapo sana masungit lang." Bulong n'ya sa sarili na nailakas pala.

"Irish!" Humagikgik ang dalaga tinakpan nito ang bibig at nag peace sign sa binatang inis na binitiwan ang hawak na papel at matiim s'yang tinitigan.

"Iligpit mo 'yang pinagkainan mo huwag mong i-asa sa mga empleyado, hindi na nila trabaho 'yan!" Mariing utos ni Gab.

"Irish! Narinig mo?" Singhal nito nang makitang tila hindi s'ya nito pinapakinggan.

"Oo! Ako ng bahala." Nilingon n'ya ito at nakita n'ya na hindi lang itim na Ring ang nasa gawing uluhan nito kundi may dalawang mahahabang sungay na ito sa noo. Napatakip sa bibig si Irish at nagpigil na mapahagikgik. Masamang tingin ang ipinukol sa kan'ya ni Gab.