Simula

"Manloloko!"

Napailing na lang ako sa sigaw niyang 'yon. Madilim ang lugar at tanging mga ingay lang ng kuliglig at nang kanyang sigaw ang maririnig. Napakalamig din ng hangin dala siguro ng mga naglalakihang puno sa aming paligid.

Nakangisi akong humarap sa lalaking lobo na ngayon ay nakatali sa isang malaking puno. At hindi ko maiwasang mapangisi dahil halos patayin na niya ako sa kanyang mga tingin.

"Kalma," ani ko bago dahan dahang hugutin ang patalim na nakalagay sa aking bewang. "Tagal mong nagtago, ah."

Aba, siraulo pala siya, eh. Inabot ako ng limang araw para lang makita siya. Napakailap ng isang 'to. Hindi niya alam na napakaimportante ng oras ko.

"I-Ikaw si Prodigy? T-Tang-ina mo!"

Muli akong napailing. "Hindi mo ba alam na masamang magmura? Baka mapunta ka niyan sa impyernong gago ka."

Kuminang pa ang hawak kong patalim nang masinagan ito ng buwan. Nanlaki ang mata nito nang makita kung gaano iyon kahaba.

Kilala ako sa paggamit ng espada bilang pagpatay sa mga Rouges. Makaluma raw sabi ng ilang hunter na nakakasalamuha ko pero wala akong pakialam. Di hamak na mas magaling ako sa kanila kaya bakit ako magpapaapekto? Nakabaril na ang ilan sa mga hunters pero iilan lang ang napapatay nila.

"Kuya, paparating na sila! Papatayin mo ba yan o ako na? Sayang ang oras!" sigaw ng kapatid ko na nakatayo sa isa sa mga sangay ng puno.

"Nilinlang niyo 'ko! Bakit hindi niyo sinabing mga hunter kayo?"

Hindi ko maiwasang matawa. Ngayon ay mukhang hindi ko na kailangang gamitin ang espada ko. Hindi na ako nagtaka nang tumarak ang shuriken ng kapatid ko sa kanyang noo.

"Bakit mo naman ako inunahan?" tanong ko sa kanya.

Tumalon ito pababa sa puno. At naglakad para kunin sa noo ng lobo ang kanyang shuriken.

"Alam ko na kung bakit naging Rouge ang isang 'to. Paniguradong tinanggal sa pack dahil sa kabobohan," sagot nito.

Narinig ko na ang mga kaluskos sa hindi kalayuan.

"Tara na," ani ko bago pumunta sa pwesto ng lobo.

Hinawakan ko ang buhok nito at hiniwa ko ang kanyang leeg. Pag-alis namin ay siyang pagkarinig namin sa mga alulong.

"Matt," ani ko sa kapatid ko habang tumatakbo.

Lumingon ito. "Hmm?"

"Matulog ka na. Ako na lang ang magdadala nito sa mga officials."

"Kumain ka kaya muna kuya? Baka malipasan ka," sabi nito na nagpangiti sa akin.

Baka nga malipasan ako. Apat na oras ang lalakbayin ko para lang maihatid ang ulo nito. Napailing na lang ako. Kakaiba talaga itong kapatid ko. Sa edad na 16 ay halos mas matanda pa kung mag-isip sa isang katulad ko na 20.

Nadaanan namin ang mauusok na mga eskinita. Wala nang tao. Walang buhay. Nakakalungkot pero isa sa ang village namin sa mga naging centro nang digmaan noon. Digmaan laban sa mga lobo at ng mga Tao.

Nang makarating kami sa bahay ay agad kaming nagtaka dahil mayroong tao ang nakatayo roon. Hindi, hindi siya tao. Hindi siya normal na tao.

Agad kaming napaatras.

"Anong kailangan mo?" tanong ko.

Humarap ito. Doon namin nakita ang kulay abo nitong mata. Matangos ang ilong nito at maputla ang kanyang balat.

Ngumisi lang ito at hindi sumagot.

"Sasagot ka ba o tatanggalan kita ng ulo? Mamili ka," ani ng kapatid ko.

Napailing ang lalaki. "Chill. Labag sa batas ang gagawin mo bata," sagot nito.

Nagkatinginan kaming magkapatid. Hindi siya Rouge. Hindi namin siya pwedeng patayin.

"Sumagot ka na lang. Wag mong sayangin ang oras namin," ani ko dahilan para mapatingin siya sa akin.

Dumapo ang tingin nito sa hawak kong ulo.

"Woah, hindi ba iyan ang nasa pinakataas ng wanted list? Mukhang kayo nga ang hinahanap ko...Prodigies."

"Sabihin mo sa mga kasama mo na lumabas at wag kaming palibutan," utos ko.

Napatawa ito. "Akala ko hindi niyo napansin." Pumalakpak ito ng tatlong beses. "Labas na," aniya dahilan para lumabas ang apat niyang kasama.

Hindi katulad niya ay mas mahihina ang mga iyon. Sigurado ako. May hinagis itong kulay abo na envelope.

Nagkatinginan kaming magkapatid. Iisang pack lang ang gumagamit nito.

"Galing ako sa Hilaga. Nagpunta kami sa sentro pero hindi kami pinayagan ng mga officials na kunin ang address niyo. But our pack is in a big chaos. Our Alpha needs your help."