Chapter 17

HUMINGA muna ako nang malalim bago pumasok sa entrance ng mall. Kailangan kong labanan ang emosyon ko kung gusto kong mabuhay. Dahil hindi lang sa love life umiikot ang buhay ko. Kailangan ko pa ring magtrabaho, kumita ng pera. Dahil hindi naman pag-ibig ang nagpapalamon sa akin.

Though sa bawat hakbang ko palapit sa store na pinagtatrabahuhan ko ay parang unti-unti nang nanghihina ang mga tuhod ko. Madaraanan ko kasi ang fast food kung saan nagtatrabaho si Dino.

Sinisikap kong huwag matuksong malingon doon ngunit nagawa pa rin ng mga mata ko. Sa counter nakapuwesto si Jessa at nakita ko nga itong abala sa pag-aayos ng suot nitong headcap. Dahil hindi pa open sa mga costumer ang mall nang mga oras na iyon ay mga empleyado pa lang ang nasa loob.

Naisip ko itong komprontahin. Para ipaalam dito kung ano'ng naging dulot sa pagpasok nito sa relasyon namin ni Dino. Gusto ko pa ring ipaglaban kung ano'ng meron kami. Dahil mahal ko pa rin si Dino at hindi ko alam kung makaka-move on ba ako.