Kabanata 3

“So gusto ng Dad mong papasukin ko ang negosyo niyo rito sa lugar namin?” pag-uulit ni papa sa sinabi ni Fourth o Jacques. Mas maganda ang Fourth kaya iyon na lamang ang itatawag ko sa kaniya.

Marahan siyang tumango bago sumubo ng pagkain.

“I see, sabihin mong ayos lang naman sa ’kin pero dapat muna kaming mag-usap ng personal. Gusto ko rin siyang makilala,” dagdag pa ni papa.

“Makakarating po,” sagot naman ni Fourth.

Tiningnan ko si Dani kung nagtataka rin siya gaya ko ngunit nakatuon lamang ang atensyon niya sa kinakain. Parang walang pakialam sa pinag-uusapan ngayon.

“Ilang taon ka na nga ulit, iho?” tanong ni Tita Dette.

“20 po”

Nalaglag ang panga ko sa sagot niya. 20? Kaya pala mas mukha siyang nakatatanda sa ’kin. 17 pa lang ako at si Dani naman ay 19. Kung ganoon, nasa kolehiyo na siya? Saan kaya siya nag-aaral?

“Anong kurso ang kinuha mo?” dagdag na tanong ni Tita. Hinintay ko ang sagot niya.

“Business related din po”

Tumango na lamang si Tita.

“Sabagay, ikaw ang nag-iisang tagapagmana ng negosyo ng mga magulang mo. Itong si Danica law ang kinuha. Si Ysa naman hindi pa niya alam kung anong kukunin”

Nahihiya kong ibinaling ang atensyon sa pagkain. Tiyak akong nakatingin siya ngayon sa ’kin.

“She’s still young. May oras pa siyang mamili ng kukuning kurso”

Kinagat ko ang ibabang labi. Parang hindi ko nagustuhan ang sinabi niyang bata pa ako kahit totoo naman.

“Babalik ka ba agad ng Maynila, Jacques?” tanong ni papa kaya ako nakahinga nang maluwag. Nawala kasi ang sa tingin ko ay mga matang nakatingin sa ’kin kanina.

“I’ll stay for a week. Isang Linggo rin naman kaming walang pasok. Inutusan ako ni papa na maglibot at humanap ng magandang puwesto rito so I’ll take that as a chance”

Isang Linggo. Kung ganoon sa Maynila siya nakatira? Kaya pala hindi ko na siya muling nakita matapos ang una naming pagkikita. Baka umuwi na siya noon.

“That’s great. Sasamahan ka ni Ysa. Alam niya ang pasikot-sikot dito sa lugar namin”

Muntik na akong mabulunan nang mabanggit ang pangalan ko.

“P-Po?” sabay tingin ko kay papa. Bakit ako?

“Wala kayong klase bukas ng hapon tama ba? Samahan mo siya bukas na maglibot”

Gusto kong sabihin na may lakad kami ni Josh bukas. Binalingan ko si Fourth para man lang sana makahingi ng tulong tutal narinig niya naman ang pinag-usapan namin ni Josh kanina ngunit nagpatuloy lamang siya sa pagkain. Napabuntong hininga ako at tumango.

“Sige po”

Kita ko ang pag-angat konti ng labi niya sa narinig pero agad din ‘yung nawala.

Matapos ang hapunan, nag-usap pa sila ni papa sa hardin habang kami naman ni Dani ay umakyat na sa kanya-kanya naming silid. Pumunta akong balkonahe at dumungaw. Seryoso ang kanilang pag-uusap. Maya-maya pa ay nagtagpo ang mga tingin namin ni Fourth. Gulat akong napaatras at nagtago. Nang dumaan ang ilang minuto, muli akong dumungaw at nakita kong wala na sila roon. Dali-dali akong lumabas at tinakbo ang hagdanan pababa. Gulat akong napahawak sa dibdib nang makasalubong ko si papa na papaakyat na.

“Pa, tapos na kayong mag-usap?”

Kumunot ang noo niya pero tumango na rin bilang paunang sagot.

“Gusto na niyang magpahinga at gumagabi na rin kaya pinauwi ko na. Ikaw? Bakit hindi ka pa natutulog?”

“Ah eh...,” inikot ko ng tingin ang buong sala para humanap ng dahilan.

“Nauuhaw ako. Gusto kong uminom muna bago matulog. Sige po. Pupunta lang muna ako sa kusina. Good night”

Sinabi ko kay Josh na hindi matutuloy ang plano namin mamayang hapon. Ayos lang naman sa kaniya dahil may susunod pa naman daw. Nang matapos ang klase namin, nakita kong naghihintay na si Fourth sa labas ng school namin. Kalmado siyang nakasandal sa kotse niya at walang pakialam kahit na pinagtitinginan na siya ng mga tao. Kita ko ang paghanga sa mga mata ng mga babaeng nakakakita sa kaniya.

“Hi,” pagbati ko dahilan para mapatingin siya sa ’kin. Umalis siya mula sa pagkakasandal at inilabas ang mga kamay mula sa bulsa ng pantalon.

“Hey, you done?”

Tahimik akong tumango bilang sagot.

Saglit na nangunot ang noo niya at sumimangot.

“B-Bakit?” kinakabahan kong tanong. May nagawa ba akong mali?

“Disappointed ka ba dahil hindi natuloy ang date niyo ng batang ‘yun?” malamig niyang tanong at bahagya akong inirapan.

“Ha?” hindi makapaniwala kong bulalas.

“H-Hindi ah! G-Gutom lang ako,” dahilan ko at tumingin sa street foods sa tabi-tabi.

“Saglit lang, bibili lang ako” paalam ko at tumakbo patungo kay Manong Dante bago pa siya makaalma.

“Hi, Manong. Dalawang kwek-kwek nga po. Tatlo nito, at fishball na rin”

“Uy, Ysa! Tapos na ang klase niyo?” tanong ni Manong habang niluluto ang order ko.

“Ah opo, half day lang po ngayon”

“Ay ganoon ba? Sayang naman. Mukhang aalis agad ako rito maya-maya. Wala pala kayong klase,” malungkot niyang saad.

Para namang dinurog ang puso ko sa sinabi niya. Sabagay, mas malaki nga ang kinikita nila kapag mga estudyante ang bumibili.

“May night market naman po mamaya. Hindi po ba kayo magtitinda roon?”

“Tiyak na maraming magtitinda mamaya, iha. Pero oo, magtitinda pa rin ako kahit na iilan lang ang bibili”

“Naku, masarap naman po ang tinda niyo, e. Sigurado po akong maraming bibili sa inyo. Sa inyo nga po ako bumibili lagi ‘diba?”

“Ikaw talaga. Salamat sa pagpapagaan ng loob ko, Ysa. Oh, ito na. Ikaw lang ba ang kakain nito?” sabay bigay niya sa order ko.

“Ay hindi po—”

“Magandang hapon, Sir. Bibili po kayo? Pili lang po”

Napalingon ako sa kausap niya. Si Fourth, seryosong nakatingin sa hawak ko. Ngumiti ako sa kaniya. “Kumakain ka nito? Bumili ako nang marami. ‘Lika, samahan mo akong kumain”

Nagkibit-balikat siya at kinuha ang isang serve ng kwek-kwek saka nagsimulang kumain. Mas lalo pa akong napangiti.

“Masarap?” tanong ko. Kita ko naman na naghihintay din si Manong sa magiging sagot niya. Tipid siyang tumango at kumain ulit.

Ngiting-ngiti akong bumaling kay Manong.

“See, Manong? Sabi ko sa ‘yo, e!”

Tumawa kaming dalawa. Busog na busog kaming umalis doon. Ni hindi ko na nga kayang mag lunch pa. Sinabi ko naman na kakain na lang ulit kami mamaya pagkatapos maglibot.

“Dito maganda rin. Maraming tao at kadalasan dito rin nagpupunta ang mga turista,” saad ko. “Ano bang klaseng negosyo ang meron kayo?”

“Mall ang gustong ipatayo ni Dad dito sa lugar niyo,” aniya at lumingon-lingon.

Napakagat labi ako dahil sa tingin ko hindi naman yata iyon ang sagot sa tanong ko. Pero ayos na rin. At least ngayon alam ko na kung anong pakay nila sa lugar namin.

“Ah, okay. May mga mall na rito pero hindi naman ganoon kalaki. Gusto mo pang maglibot?”

Tumango siya ka muli kaming pumasok sa kotse at nagmaneho paalis. Nakailang libot pa kami at kung saan-saan na kami napupunta. Wala naman siyang sinasabi sa bawat lugar na napupuntahan namin at ako lang ‘yung salita nang salita.

“Gumagabi na,” sabay dungaw ko sa bintana ng sasakyan. Ilang oras na rin pala kaming naglilibot.

“Gusto mo nang umuwi?” tanong niya.

“May gusto pa sana akong puntahan”

“Saan? I told your father na ihahatid kita pauwi”

Kagat labi akong tumingin sa kaniya.

“Sa night market sana”

Huminga siya nang malalik at tumango.

“Okay, tell me where”