TIW 4. Las Vegas

"Sino ka?!" Halos mapatili si Margarette nang magising na may katabing lalaki sa kama.

At hindi lang basta lalaki! Isang gwapong lalaki! Hindi, sobrang gwapo! Iyong tipong hindi lang lilingunin. Ito iyong klase ng gwapo na gusto mong titigan maghapon magdamag.

N*******d ito ng pang-itaas kaya naman kita ng mga nanlalaki niyang mga mata ang tila mga inukit sa pagkaperpekto nitong mga abs!

"Done checking me out?" Tumaas ang sulok ng mga labi nito sa isang ngisi. 

"Anong checking you out?! Hoy, kung sino ka man, lumabas ka ngayon din! Kung hindi ay kakasuhan kita! Kakasuhan kita ng, ng—" napatingin siya sa sarili niyang balot na balot. 

"Ng?" Kunot noo nitong hamon sa pagitan ng nakakaloko pero gwapo nitong pagkakangiti. 

"Basta! Lumabas ka!" tili niya.

"Unang araw nating mag-asawa pero pinapalayas mo na ako agad, Mrs. Soh?" 

Nanlaki ang mga mata niya. Ano ang sinasabi nito?! 

"Hoy, hindi magandang biro 'yan, ha? Kung ayaw mong lumabas, ako ang aalis!" Hinagilap niya ng tingin ang bag niya na hindi naman siya nabigong makita sa ibabaw ng bedside table. Agad niya iyong kinuha at nagmartsa papunta sa pinto. 

"Stop right there, Margarette," tumayo mula sa kama ang gwapong lalaki at lumapit sa kanya. 

Napahinto siya dahil tinawag nito ang pangalan niya. Kilala siya ng gwapong lalaki!

Pakiramdam niya natuyuan siya ng lalamunan nang tumambad nang mainam sa harapan niya ang sexy nitong katawan. 

"You don't remember anything, do you?" tanong nito.

Sinikap niyang iangat ang tingin sa mukha ng may katangkarang lalaki. Nasa limang talampakan at apat na pulgada ang tangkad niya. Pero malaki pa rin ang agwat nila nito. Tantya niya ay nasa anim na talampakan pataas ito. 

"Ano ang ibig mong sabihin?" 

Bahagya muna itong natawa at napakagwapo nito nang tila sumayaw pa sa katuwaan ang magaganda nitong mga mata. 

"My name is Wallace Soh. And yesterday, last night to be exact, we got married. Here in Las Vegas."

"Las Vegas?!" Mas nasorpresa siyang nasa Las Vegas sila kaysa sa nauna nitong sinabi na nagpakasal sila.

Paano sila napunta roon kung ang huli niyang naaalala ay nag-walk out siya sa wedding planning nina Michaela at Bobby? At sa Pilipinas iyon! Pilipinas!!!

Paanong nasa Las Vegas na siya ngayon? Sino si Wallace Soh? Teka— Wallace Soh?! Narinig na niya ang pangalang iyon dati. Pero hindi niya maapuhap sa alaala kung saan at kanino niya narinig ang pangalan nito.

"I asked you to marry me and you said you'd like to be married in Las Vegas," sabi pa nitong hindi nabubura ang ngiting nakakaloko.

"I said that?!" Imposible! Hindi niya pangarap magpakasal sa saan mang lugar na may divorce! 

Tumango ito. "We flew right here and got married. And that's how you became Mrs. Soh." 

Pinanliitan niya ito ng mga mata niya na wari ay inaarok kung seryoso ito o nangti-trip lang. Bakit kasi wala siyang maalala? 

"Naka-drugs ka ba?" Nagawa niyang itanong ang kanina pang pagdududang naglalaro sa utak niya.

Paanong ang isang katulad nito ay naatim magpakasal sa katulad niya? Maliban kung wala ito sa sarili nito at nasa impluwensiya ng ipinagbabawal na gamot!

Nangunot ang noo ni Wallace. "Pardon?"

"Hindi ako naniniwala sa 'yo! Imposible ang sinasabi mo, Mr. Soh! Para sabihin ko sa 'yo, hindi ako gullible na nagpapapaniwala sa kwento ng kung sino!" sabi niya sabay talikod.

Anong kasal kasal? Anong Las Vegas? Hindi siya naniniwala! Sigurado siyang paglabas niya sa lugar na iyon ay nasa Maynila pa rin siya!

"Hindi ba't nagpauto ka sa kagaya ni Bobby?" seryosong ani Wallace na nagpahinto na naman sa tangka niyang pagwo-walk out. 

Kilala nito si Bobby???

"Pumayag kang magpakasal sa akin para gantihan sina Michaela at Bobby."

Nanlalaki ang mga mata niya nang muli niya itong lingunin. Seryoso na ang mukha nito at wala ng bahid ng kahit na anong pagbibiro. 

"Pwede ka bang maupo para maipaalala ko sa 'yo kung paano tayo napunta rito?" 

Wala sa loob na napatango siya. 

MAKALIPAS ang sampung minutong kwento, hindi pa rin makapaniwala si Margarette. Hindi niya lubos maisip na nagpakadesperada siya. 'Asaan ang sensible CEO ng MV Industries, Inc.? 

Iniwanan siya ng utak niya kung kailan kailangan niya ito!

Nagpakalasing siya, nagkrus ang landas nila ng lalaki, lumipad sa Las Vegas ora mismo, at ngayon nga ay kasal na siya sa isang Wallace Soh. 

Naunahan pa niya sina Michaela at Bobby! Ngayong napag-isip-isip niya, maganda ngang pagbangon sa naapakan niyang pride ang pagpapakasal na una sa mga ito. 

Pero teka, para lang ba makaganti siya kaya siya pinakasalan ng gwapong lalaki? Napakabait naman nito kung sakali? 

"Bakit mo ako tinutulungang makaganti?" tanong niya, nasa baba na sila ng hotel at nag-aagahan. Nakumpirma na nga niyang wala sila sa Pilipinas base sa mga taong puro ibang lahi na nakikita niya sa paligid. "Ano ang kapalit nito?"

Ipinaliwanag kanina ni Wallace na inom daw kasi siya ng inom ng alak bago sila umalis, at habang nasa flight kaya nang magpakasal sila, literal siyang bangag. 

Kung tutuusin, pwede siyang magreklamo. Pero nasa Vegas nga pala sila. Lahat pwede sa lugar na iyon na napakabilis lang magpakasal.  

Uminom muna ng tubig nito si Wallace at nagpunas ng bibig bago siya tiningnan at sinagot.

"It's good that you asked. Una sa lahat, gusto kong malaman mo that I do not wish us to be married for longer than a year," umpisa ni Wallace.

Weird. Pero may gumuhit na disappointment sa puso ni Margarette. Hindi naman iyon sa kung anong dahilan dahil realistic siyang babae. Alam naman niyang imposibleng na-love at first sight sa kanya ang gwapong lalaki. 

Pero sa maikling sandali, umasa siyang totoo ito sa intensyon. Pero lahat pala talaga ng bagay ay may kapalit. 

"May dalawang rason ako kung bakit kita pinakasalan. Una, para patahimikin na ako ng Mama ko sa kakakumbinse niyang mag-asawa na ako. Pangalawa, para bumalik sa akin si Camila."

"Sino si Camila?" tanong niya. Obvious naman pero gusto pa rin niyang malaman.

"My ex. Iniwan niya ako for my best friend. So believe me, Margarette. I knew exactly how it feels to be betrayed by the people you love," may bahid nang matinding galit ang tinig nito. 

"Pero gusto mo pa rin siyang bumalik?" Nalilitong tanong niya. Niloko na, gusto pang balikan? 

Ayaw ni Margarette ng gano'n. Mahal niya si Bobby. Pero hindi niya nais na balikan siya nito matapos ang panloloko nito. 

Pero iba si Wallace. Siguro nga ay sadyang mahal nito ang Camila na iyon. 

"Alright. So, how exactly do we execute our plan?" tanong niya ulit nang hindi sagutin ni Wallace ang nauna niyang tanong. 

Sukat doon ay ngumiti na ito ulit at nawala na ang medyo hindi magandang vibe nito kanina. 

"Let's fly back and surprise everyone. Linggo na ang dating natin sa Pilipinas. Kasal ng mahal mong Bobby at ng kapatid mo." 

Tama ito. Humugot siya nang malalim na buntong hininga. Gusto ba talaga niyang masaksihan ang pag-iisang dibdib ng mga taksil? 

Sa kabilang banda, mukhang magandang ideyang idisplay sa kapatid niya ang gwapo niyang napangasawa. 

Mas gwapo si Wallace kaysa kay Bobby. Not to mention na matured ang itsura ng una kumpara sa ex niya na mukhang 'di pa tapos magloko sa buhay. 

At nakakatuwa sigurong isipin na kahit mainggit pa si Michaela, hindi na nito maaagaw pa si Wallace dahil ikakasal na ito kay Bobby.