CHAPTER 4

Bago pa man lumapat ang labi ni Brix ay iniharang na ni Hexy ang kaniyang kanang kamay sa kaniyang bibig. Dumampi ang labi ni Brix sa kamay ni Hexy kaya napaatras siya.

"S-Sorry, hindi ko sinasadya," pagpapaumanhin ni Hexy saka umayos ng upo.

"I'm sorry. I'm tempted," nahihiyang wika ni Brix at napaiwas ng tingin.

Hindi naman maiwasang bumilis ang tibok ng puso ni Hexy nang maramdaman niyang pamilyar sa kaniya ang lambot ng labi ni Brix.

Napahawak siya sa kaniyang palad kung saan tumama ang labi ni Brix.

"M-Mauna na ako," sambit ni Hexy at biglang tumayo saka kinuha ang bag.

"What about our dinner?" Tanong naman ni Brix saka tumayo na rin.

"Next time na lang siguro? May pupuntahan pa kasi ako," sagot naman niya.

Napakagat siya sa loob ng kaniyang bibig nang ma-realize niyang gusto niya pa ng 'next time'.

"Okay. Ihahatid na lang kita," pagpriprisinta ni Brix.

Hindi pa man nakakasagot si Hexy ay napatingin agad si Brix sa kaniyang cellphone na nag-vibrate. Pinatay niya agad ito nang makitang nag-aalarm lang iyon.

"Hindi na. Kahit ihatid mo na lang ako sa baba," nakangiting wika naman ni Hexy. Ngumiti naman si Brix sa kaniya.

Habang nasa loob sila ng elevator mabilis pa rin ang tibok ng puso ni Hexy nang maalala ang nangyari noon sa pagitan nila ni Brix, at ang muntikan na namang halikan nila kanina.

Nang makababa sila ay mabilis na nagpaalam si Hexy kay Brix at hindi ito makatingin nang maayos sa kaniya. Magsasalita pa lang sana si Brix ngunit sumakay na siya agad sa pinara niyang traysikel.

‘Hindi ko akalain na makakabalik ako sa lugar na 'yon.’

Napatakip siya sa kaniyang mukha gamit ang kaniyang bag at pinigilang tumili.

‘Ano 'tong nararamdaman ko?’

Ilang beses siyang napasapo sa kaniyang ulo dahil hindi niya inakala ang mga nangyayari.

"Sa gilid na lang po," wika niya saka bumaba nang huminto ang traysikel.

Agad niyang inilabas ang cookies na binili niya habang nakangiting naglalakad.

"Hello po, tita!" Bati niya saka umupo sa harapan ng puntod ng ina ni Maverick.

Inilapag niya ang cookies sa tabi ng tatlong rosas na nakalagay doon.

"Hindi po kami maayos ng magaling mong anak, tita. Naging masama na po ang ugali niya," panimula niya.

"Nag-aaway po kasi kami dahil sa iisang lalake," sambit pa ni Hexy at saka siya napatingin sa kalangitan.

"Nakuwento niyo po sa'kin dati, tita, na maikling panahon niyo lang nakilala si tito at nahulog ka na sa kaniya," napapangiting sabi niya pa.

"Naguguluhan po ako, tita. Kasi napakaimposible namang mahulog ako nang ganoong kabilis," saad niya saka pinaglaruan ang damo sa kaniyang paanan.

"Ayaw kong sumama sa kaniya, pero hindi ko mapigilan ang sarili ko," mahinang wika niya saka hinawi ang buhok na inililipad ng hangin. Napabuntong-hininga siya habang iniisip si Brix. Napakagat siya sa loob ng kaniyang bibig at saka ibinalik ulit ang paningin sa puntod.

"Mahal ko po si Mavs, tita. Pero hanggang kailan po ba dapat ako maghintay para tratuhin niya po ako ng deserve kong treatment?"

Kinabukasan ay hindi pa rin mawala sa isipan ni Hexy ang nangyari sa kanila ni Brix sa unit nito.

Habang lunch break nila ay nakatunganga lang siya sa at paisa-isang sumusubo ng pagkain.

Napa-roll eyes siya nang maupo si Maverick sa harap niya.

"Tinanong nina Vanessa kung bakit wala ka ro'n kahapon," mahinang wika ni Maverick saka nagsimulang kumain. 

"Sana sinabi mo na umalis ako dahil masama ang ugali mo," kalmado namang sabi ni Hexy. Napatigil naman si Maverick at tumingin sa kaniya. 

Napabuntong-hininga lang ito saka itinuloy ang pagkain. Wala namang nagawa si Hexy kung hindi ang tignan ito nang masama habang kumakain.

Habang kumakain ay naalala niya kung paano tumingin si Brix sa kaniyang labi kahapon.

Napaubo si Hexy nang mabulunan siya habang kaumakain. 

Agad namang iniusog ni Maverick ang sarili niyang baso sa harap ni Hexy. Hindi naman nag-isip si Hexy at uminom na lang din.

‘Indirect kiss.’

Napailing naman siya agad.

"Hexy," tawag ni Maverick sa kaniya kaya napatingin ito sa kaniya bago pa siya sumubo.

"Hindi ko dapat sinabi 'yon sa'yo," sinserong wika nito. 

May kung ano'ng naramdaman si Hexy nang marinig niya ang malambing na tono sa boses ni Maverick.

"Dapat ka talagang mag-sorry kasi nakakainsulto ka na," sambit naman niya.

Hindi naman umimik si Maverick at tumingin lang sa kaniya nang seryoso.

"So, hindi ka mag-sosorry?" Kunot-noong tanong ni Hexy sa kaniya.

"Babawi na lang ako," walang-ganang sabi ni Maverick.

Nagpigil naman ng ngiti si Hexy nang marinig iyon kahit nakaramdam siya ng kaunting pagkadismaya.

"Ano? Hindi ko marinig," pang-iinis niya habang nakangiti, at inilapit pa ang mukha niya kay Maverick.

"Ang lapit mo, baka mahalikan kita," seryosong sabi ni Maverick kaya napaatras siya. Umiling-iling pa si Maverick nang makitang nanlaki ang mga mata ni Hexy at napatakip sa bibig niya.

"Pupunta na ako mamaya sa tambayan," wika ni Hexy. Tumango-tango naman si Maverick saka uminom sa baso na pinag-inuman ni Hexy.

Napalunok si Hexy nang makita iyon.

‘May magbabago kaya sa'min kung siya ang nakasama kong nagising sa iisang kuwarto? Mamahalin na kaya niya ako?’

Napatigil siya sa pag-iisip nang mapatingin si Maverick sa kaniya.

"Saan ka nagpunta kahapon?" Tanong ni Vanessa nang makaupo si Hexy sa harapan nila.

Inilapag ni Hexy ang kaniyang bagong biling bag sa kaniyang hita saka umayos ng upo. Sasagot na sana siya kaso nagsalita si Maverick na kakarating lang din.

"Sa puntod ni Mama," sagot ni Maverick.

Kumunot naman ang noo ni Hexy at nagtaka kung paano niya nalaman iyon.

"Pumunta ako kaninang umaga at nakita ko ang inilagay mo," dagdag ni Maverick saka naglapag ng maiinom nila sa lamesa.

Tumango-tango naman si Hexy saka kinuha ang nag-iisang milktea.

"So, Hexy, may paramdam na ba si Sir Brix?" Tanong ni Shantal saka uminom ng kape. Nabulunan naman si Hexy at agad na nagpunas ng kaniyang bibig gamit ang kaniyang panyo.

Napapikit siya nang maalala ang nangyari sa kanila kahapon.

"Narinig lang ang pangalan ni Sir Brix, nabulunan ka na," natatawang sambit ni Aldrin saka sila nag-apiran ni Rio.

"Alam mo, Hexy, halata ka na," pagbibiro naman ni Rio.

"Huwag niyo munang i-pressure si Hexy. Hindi pa 'yan nakaka-move on, eh," wika ni Vanessa saka sumulyap kay Maverick.

"Hayun! Eh, Maverick, hindi ba wala ka namang gusto kay Hexy? Hahayaan mo naman siguro siyang ligawan ni Sir Brix, 'di ba?" Diretsahang tanong ni Shantal. Napatingin naman silang lahat kay Maverick na abala sa kaniyang cellphone habang umiinom.

Nakaramdam ng kirot ang puso ni Hexy nang tanungin iyon ni Shantal dahil alam niyang gusto pa rin niya ito. 

"If Hexy likes him," sagot ni Maverick saka tumingin kay Hexy. 

Umiwas naman agad ng tingin si Hexy at uminom na lang. 

Mas lalong naging maingay sina Rio nang sabihin iyon ni Maverick at kinantsawan si Hexy.

Hindi naman natuwa si Hexy sa mga ginagawa nila.

‘Sana matapunan niya ng kape ang sarili niya para makita ko kung gaano siya kamanhid.’

Napatigil sila sa pag-aasaran nang may humintong puting van malapit sa kanila dahil wala naman masyadong humihinto ro'n. 

Napalunok si Hexy nang makitang si Brix ang bumaba sa sasakyan at naglalakad na papalapit sa kanila.

Napaayos agad siya ng upo nang biglang ngumiti si Brix habang lumalapit. Tinignan niya ang kaniyang sarili saka inayos ang damit.

"Ano pong ginagawa niyo rito, Sir?" Tanong ni Rio nang makalapit si Brix sa kanila.

Napainom na lang si Hexy sa kaniyang milktea at napasulyap kay Maverick na seryosong nakatingin kay Brix. 

Hinawakan ni Hexy ang kanang braso ni Maverick nang maalala ang ginawa nito kay Brix. Napalingon naman ito sa kaniya.

"I just wanna ask you guys na mag-dinner kasama ko," nakangiting sagot ni Brix.

"Aysus! Sir, baka naman si Hexy ang gusto niyong ayain talaga?" Pang-aasar naman ni Shantal saka sila nagtawanan.

"She rejected me," wika naman ni Brix. Nanlaki naman ang mga mata ni Hexy.

"So, you asked her out na pala, Sir?" Sambit ni Vanessa saka tumingin ng parang nang-aasar kay Hexy.

"Yeah. Pero she's always busy. Kaya naisip kong imbitahan na lang kayong lahat."

Hindi naman nakaimik si Hexy dahil hindi alam ng mga kaibigan nila na nag-away sina Maverick at Brix.

"Tara na! Saan po ba tayo today, Sir?" Tanong ni Aldrin saka tumayo at inayos ang sarili.

"Sa yate namin," sagot naman ni Brix.

"Wow! Ang sosyal naman! Parang nakakahiya tuloy!" Eksaheradang sambit ni Shantal.

"It's okay. Friends naman kami ni Hexy, eh. And you can treat me as your friend too," nakangiting sabi ni Brix. 

Napakagat naman si Hexy sa loob ng kaniyang bibig.

"Ah. Friends naman pala," pang-aasar ni Vanessa kay Hexy.

"So, let's go?" Aya ni Brix sa kanila. 

Tumayo naman sila, maliban kina Hexy at Maverick.

"Uuwi na lang ako," mahinang saad ni Maverick saka tumayo at tinanggal ang pagkakahawak ni Hexy sa kaniya.

"Ang kj naman ni Maverick," komento ni Vanessa kaya napatingin sila sa kaniya, pati na si Brix.

"You can come," kalmadong sabi ni Brix habang nakatingin kay Maverick.

Hindi naman ito umimik at seryoso lang itong nakatingin sa kaniya.

Aalis na sana si Maverick nang hawakan ni Hexy ang kaniyang kanang braso kaya napalingon siya.

"Sumama ka na, please," mahinang wika ni Hexy, sakto lang para marinig niya.

Ilang segundo pa ay bumuntong-hininga si Maverick bago tumango.

Tahimik lang si Hexy habang umaakyat sila sa yate at abala sa pagtingin sa paligid. Humaplos sa kaniya ang malamig na hangin na nagmumula sa dagat.

Nang makaakyat silang lahat ay agad na umandar ang yate papunta sa gitna ng dagat.

Abala sina Shantal na makipag-picture kay Brix, habang si Maverick ay nakahalukipkip na nakatingin sa papalubog na araw.

Naagaw ng tingin ni Hexy si Brix at nagtagal ang paningin niya rito. Biglang bumilis ang tibok ng puso niya kaya napahawak siya sa kaniyang dibdib.

Napatigil siya sa paghinga nang lumingon si Brix sa kaniya habang nakangiti.

Kumaway ito sa kaniya kaya napangiti naman siya.

Tumalikod siya at napansing nakatingin si Maverick sa kaniya. Malalim ang tingin nito sa kaniya habang nakahalukipkip.

Lalapit na sana si Hexy upang kausapin ito ngunit pumagitna si Vanessa.

Nang makalapit si Vanessa ay sinulyapan pa rin niya si Maverick ngunit lumayo ito sa kanila habang abala sa kaniyang cellphone.

"What do you think about him, Hex?" Tanong ni Vanessa.

"O-Okay naman siya sa atin. Nakakapanibago lang," sagot naman niya.

"Ang bait niya," wika ni Vanessa saka tumingin sa araw.

Napatingin din doon si Hexy saka mas lumapit sa kaniyang kaibigan.

"Gusto kong sabihin 'to dahil magkaibigan tayo," dagdag pa ni Vanessa kaya napalingon ulit si Hexy sa kaniya.

"You deserve him. I'm not against sa pagmamahal mo kay Maverick, pero ngayon lang ako nakakita ng lalakeng sobrang special ang treatment sa'yo," sabi nito habang nakangiti. 

Biglang bumilis na naman ang tibok ng puso ni Hexy at namawis ang kaniyang mga palad.

"P-Paanong deserve ko siya? Wala pang kami," natatawang sagot naman ni Hexy saka ipinunas ang mga palad sa gilid ng kaniyang suot na trouser.

"See? Wala 'pa'. Wala pa sa ngayon. Hex, I think he likes you," sambit naman ni Vanessa saka inayos ang buhok ni Hexy na inililipad ng hangin.

"Van, imposible 'yang sinasabi mo kasi—"

"Wala siyang excuses pagdating sa'yo. Negosyante siya, wala siyang masyadong time. Pero binibigyan ka niya ng oras. Hindi ba nakapagtataka na binibigyan ka niya ng oras kahit may mga kailangan siyang gawin. You know kung gaano ka-busy ang mga mayayaman," pagpapaliwanag ni Vanessa.

Nang marinig iyon ni Hexy ay biglang nanlambot ang kaniyang puso at nakaramdam ng kaunting tuwa.

"Huwag natin bigyan ng malisya ang pagiging close niya sa'kin, Van," natatawang wika ni Hexy ngunit hindi mapakali ang kaniyang mga palad, at namamawis pa rin ang mga iyon.

"Sinabi niya sa'min kanina na katatapos lang ng meeting niya. Magpapahinga sana siya, pero gusto ka raw niyang makita," dagdag pa ni Vanessa saka lumingon sa gawi nina Brix.

Napalingon din si Hexy doon at napalunok siya nang makita niya kung gaano ito kasaya kasama nila.

Napakagat na naman siya sa loob ng bibig niya at sumulyap sa gawi ni Maverick. Abala naman ito sa kaniyang cellphone habang humihithit ng sigarilyo. 

‘Ayokong i-compare silang dalawa, pero sobrang layo talaga nila sa isa't isa.’

"Masyado akong masaya, pero natatakot ako," mahinang sambit ni Hexy kaya napalingon si Vanessa sa kaniya.

"Natatakot saan?" Nagtatakang tanong nito.

Bumuntong-hininga naman si Hexy at matagal na natahimik bago magsalita.

"Natatakot ako sa mga puwedeng mangyari kapag may magawa akong maling desisyon," wika ni Hexy.

Mas kumunot naman ang noo ng kaibigan niya.

"I don't get you, Hex," saad ni Vanessa.

"Naguguluhan ako. Parang nagkakagusto na ako. Parang may feelings na rin ako kay B-Brix."