SIMULA

"Tanggap ka na," pagbabalita ng sekretarya ni Mr. dela Vega. 

Namilog ang mata ko at hindi makapaniwala. "Totoo? Tanggap na talaga ako? Wala po bang halong biro 'yan?" Hala! Hindi ako makapaniwala. 'Di ko talaga ito inaasahan. Natanggap ako sa isang kilala at isa sa pinakamalaking kompanya sa bansa. Isa lang akong high school graduate, idagdag pang wala akong experience sa trabahong papasukan ko.

"Congratulations!" bati sa akin ni Miss Eve, sabay lahad ng kanyang kanang kamay. Naiiyak ko naman iyong tinanggap.

"Salamat at binigyan niyo ng chance ang isang katulad ko. Sobrang laking opportunity po itong binigay niyo sa 'kin. Pangako, gagawin ko ang best ko at gagawin ng maayos ang trabaho ko. Patutunayan kong hindi kayo nagkamali sa pagtanggap sa akin."

"Miss Rafael, please don't thank me so much. Magaling at may potential ka. No wonder Mr. Lim approves your application. 'Di na kailangan ng mahabang proseso. Ayon at aprobado na agad niya." Napangiti ako ng matamis sa sinabi niya. Grabe! Ganun ba ako kagaling? Siguro nakita nga nilang may potential ako. Nakakakilig naman ang ganito, ang saya ko talaga. Kakaiba pala talaga ang standard ng pinakamalaki at kilalang kompanya sa bansa. Kahit janitor lang ang a-apply-an dapat ay may potential ka. Promise talaga gagalingan ko sa trabaho, para ito kay Lola kaya ibibigay ko ang best ko.

"Ah… Miss Eve, hindi niyo po nabanggit kung saan ako naka assign." Nakunot niya ang noo. Ako naman itong napalunok ng malaki. Wala naman akong sinabing masama, 'di ba? Parti ng trabaho ko ang tanong na 'yon.

"Hindi ba nakalagay sa resume mo ang desired position mo?" tanong niya, hindi pa rin nawala ang kunot sa noo. Kinakabahan na talaga ako sa reaksyon niya. May mali ba sa tanong ko?

"Nilagay ko naman po sa resume. Gusto ko lang malaman kung saan ako naka-assign. Sa laki kasi ng building hindi ko kayang linisin ito sa isang araw lang."

"Wait… I'm confused. Bakit mo kailangan linisin ang buong building? Sandali nga lang, ano ba ang desired position na nilagay mo?"

"Janetress po," magalang kong sagot.

"What!?" Nanlaki ang mata na bulalas niya. "Hindi ka nag-apply para maging secretary?" 

Ilang beses akong napakurap. "S-secretary?"

"Yes! Secretary. As in sekretarya, Miss Rafael."

"H-hindi po ba hiring kayo ng taga-linis?" inosente kong tanong. Hala! Paano napunta ang resume ko sa mga nag-apply ng secretary sa kumpanyang ito? Ano naman ang alam ko sa pagiging isang sekretarya kung Housekeeping ang vocational course na kinuha ko? Ni hindi ko nga ito natapos dahil sa nangyari kay Lola.

"Oh my gosh! This is an epic fail..." Frustrated na napahilamos si Miss Eve ng mukha. Kagat labi niya akong tinitigan na wari nag-iisip ng malalim. "Marunong ka bang gumamit ng computer? Microsoft? G***l? Something like that?" Alanganin akong tumango. Alam ko naman ang mga 'yan. Syempre, tinuro 'yan sa amin noong high school.

"How about english? Nakakaintindi ka ba? Do you know how to speak english?" Napangiwi ako.

"Gets ko naman po ang ingles pero hindi ako matatas magsalita." Nakakaintindi siyang tumango.

"Pwede na 'yan.”

“Ho? Pwede saan?” 

“I'll train you. Hindi na kasi pwede na mag-open ulit ako para sa interview ng applicants. Gahol ako sa oras. Isa pa, baka hindi matuloy ang pag-alis ko kung hahanap pa ako ng ibang papalit sa akin. May isang week pa naman ako para ma-train ka sa mga kailangan mong gawin at isaalang-alang bilang secretary ni Mr. dela Vega." Namilog ang mata ko, at nalaglag ang panga sa sobrang pagkagulat sa sinabi nya. Pati nga yata buhok ko natanggal sa anit ko.

"Mimi-Mr. dela Vega? Ibig niyong sabihin ako? M-magiging sekretarya ng CEO?"

Umikot ang mata niya. "Oo, Miss Rafael. Ikaw. Simula ngayon magti-training ka para maging efficient na secretary ni Mr. dela Vega."

"P-pero Miss Eve... High school lang ang tinapos ko. Hindi ko nga nagawang makakuha ng NCII sa vocational course na pinasukan ko—"

"'Yan ang dahilan kung bakit kailangan i-train kita agad. May isang week lang ako para i-train ka ng mga basic, another one week para sanayin mo ang sarili bilang secretary ni Mr. dela Vega bago siya bumalik ng bansa."

"Sobrang pressure 'yan…."

"I know." Kinuha niya ang kamay ko. "Sa una lang mahirap, pero once nakabisado mo na ang trabaho mo easy-easy ka na lang. Don't worry, malaki naman ang sahod." 

"M-magkano po?" Napalunok ako ng malaki dahil ngumisi siya sa akin. Iyong pakiramdam na biglang alam na niya kung paano makukuha ang kiliti ko.

"The average hourly wage for an Executive Secretary is 165 pesos. Pero dahil secretary ni Mr. dela Vega ang pinag-uusapan natin dito, 200 per hour lang naman." Nanlaki ang mata ko. Hala! Ganun kalaki ang sahod? Sa isang buwan sobra-sobra pa ang kikitain ko para sa pang piyansa ni Lola!

"Miss Eve, tara na po. Ituro niyo na ang mga dapat na ituro sa 'kin!" Malakas na tawa ni Miss Eve ang pumailanlang sa lounge ng HR floor.

"Ibang klase. Ang bilis din talaga magbago ng isip mo. S'ya tara sa opisina ng Big Boss," sabi niya at hinila ako.