Take 17

“May… fishball po kayo?” pagaalinlangan kong tanong sa tindero.

Pareho silang napalingon sa akin dahil sa tanong. Kahit si Philip ay napahinto sa pagnguya ng kinakain.

“Ay hija eto lang benta ko, dun kanina sa kasamahan ko kaso lumipat ng pwesto, dun siya sa kabilang eskwelahan.” Sabi ni Mang Rodelio kung tawagin ni Philip.

Dahan dahan akong tumango at binalikan ng tingin ang mga paninda niya, hindi ko alam kung anong bibilhin.

Napabaling ako sa katabi ko. “Hindi ka kumakain ng isaw?” manghang tanong niya.

“Any of that,” nahihiyang pag amin ko.

Tinitigan niya ako tsaka tinapos ang kinakain para magbigay ng barya sa kay kuyang tindero.  “Dalawa pa sa akin mang Delio,” kumuha siya ng dalawa at ibinigay sa akin ang isa. “Kahit din naman ako ‘di ako kumakain ng iba, eto lang.”

Ibinigay niya sa akin ang isa na tinanggap ko. Mabango siya katulad ng mga typical na barbeque, kaso kakaiba dahil pa zigzag ang itsura na kulay orange.